धरानः सार्वजनिक सवारी साधनको हरेक गाडीमा सिसिटिभी जडान गर्नुपर्ने निर्देशन दिइएपछि बुधवार धरानमा भएको नेपाल यातायात व्यवसायी राष्ट्रिय महासङ्घ कोशी प्रदेश समितिको सातौँ प्रदेश अधिवेशन उद्घाटन समारोहमा यातायात व्यवसायीहरूले आक्रोश प्रकट गरेका छन् ।
सार्वजनिक सवारीमा सिसिटिभी क्यामेरा जडा गन्नुपर्ने निर्देशन अवैध शेयर विवादमा आजै राजीनामा दिएका गृहमन्त्री सुदन गुरुङले दिएका हुन । 
 धरान–१५ स्थित धरान किचनको सभा हलमा बुधवार सुरु भएको अधिवेशनमा कोशी प्रदेश समितिका संयोजक सरोज श्रेष्ठले यस्तो निर्णय व्यवहारिक नभएको भन्दै तत्काल पुनरावलोकन गर्न सरकारसँग माग गरेका छन्। उनले सरकारसँग सरोकारवालासँग छलफल नगरी एकतर्फी रूपमा नीति लागू गर्दा यातायात क्षेत्र प्रभावित हुने बताए।
व्यवसायीहरूका अनुसार सिसिटिभी जडान अनिवार्य गर्ने निर्णयले थप आर्थिक भार बढ्ने र साना तथा मध्यम सवारी सञ्चालकहरू प्रत्यक्ष रूपमा मारमा पर्नेछन्।
उनीहरूले यसअघि देखिएको जिपिएस तथा टाइम कार्ड व्यवस्थापनसम्बन्धी विवाद अझै समाधान नभइसकेको अवस्थामा अर्को कडा नियम ल्याउनु उचित नभएको बताएका छन्।
व्यवसायी प्रतिनिधिहरूले दुर्घटना न्यूनीकरणका नाममा ल्याइएका प्रविधि अनिवार्यता व्यवहारिकभन्दा बढी बोझिलो बन्दै गएको भन्दै आपत्ति जनाएका छन्। उनीहरूको भनाइमा, जिपिएस प्रणाली,टाइम कार्ड व्यवस्थापन तथा सिसिटिभी निगरानी जस्ता व्यवस्था अझै अस्पष्ट र कार्यान्वयनमा समस्याग्रस्त छन्।
यसैबिच, राजमार्गका विभिन्न स्थानमा जडान गरिएका सिसिटिभी क्यामेराहरू मर्मत अभावका कारण प्रभावकारी बन्न नसकेको गुनासो पनि गरिएको छ। सबै साना तथा ठुला सवारीमा सिसिटिभी अनिवार्य गर्नु व्यवहारिक नभएको भन्दै यसलाई व्यवसायीको इच्छामा छोड्नुपर्ने माग गरेका छन् । 
अधिवेशनमा यातायात क्षेत्रबाट सङ्कलन हुने करको कम्तीमा २५ प्रतिशत रकम सोही क्षेत्रको सुधार र सवारी व्यवस्थापनका लागि प्रदेश सरकारले विनियोजन गर्नुपर्ने माग गरिएको छ ।
सवारी साधनको २० वर्षे आयु सम्बन्धी प्रावधान व्यावहारिक नभएको भन्दै संशोधन गर्नुपर्ने माग व्यवसायीहरूले गरेका छन्। सुरक्षा र दुर्घटना न्यूनीकरणका विषयमा महिला हिंसा रोकथाम तथा सडक दुर्घटनाबाट हुने मानवीय क्षति घटाउन प्रदेश सरकारको प्राथमिकता हुनुपर्नेमा व्यवसायीहरूले जोड दिएका छन्।
कार्यक्रममा केन्द्रीय सल्लाहकार, पूर्व वरिष्ठ उपाध्यक्ष प्रसाद मैनाली प्रमुख आतिथि थिए । अधिवेशन कोशी प्रदेश समितिका संयोजक सरोज श्रेष्ठको अध्यक्षतामा सम्पन्न भएको छ । 
कार्यक्रममा केन्द्रीय पदाधिकारी, सल्लाहकार, सदस्य तथा प्रदेशका विभिन्न जिल्लाका यातायात व्यवसायी प्रतिनिधिहरूको उल्लेख्य उपस्थिति थियो ।