विराटनगर : आदर्श माध्यमिक विद्यालयमा २०८१ को शैक्षिक सत्रका लागि लिइएको प्रवेश परीक्षामा २ हजार भन्दा बढी विद्यार्थी सहभागी भएका छन् ।
विराटनगर स्थित सामुदायिक विद्यालयमा विद्यार्थी भर्नाका लागि सहभागिताको यो सङ्ख्या सबै भन्दा बढी हो ।
बालकक्षा देखि कक्षा ९ सम्म छात्रा ८७५ जना र छात्र १२३९ गरी कुल २ हजार ११४ जना विद्यार्थी प्रवेश परीक्षामा सहभागी भएको प्रधानाध्यापक सन्तोष पोखरेलले बताए ।
कुल ३७ जना विद्यार्थीका लागि लिइएको परीक्षामा यति धेरै विद्यार्थी सामेल भएका हुन् । सामुदायिक विद्यालयतर्फ देशकै उत्कृष्ट विद्यालयको पहिचान बनाएको आदर्शमा हाल ३ हजार ४७६ विद्यार्थी छन् ।
प्रत्येक वर्ष उक्त विद्यालयप्रति विद्यार्थीको आकर्षण बढेकाले प्रवेशका लागि सङ्ख्या बढेको हो । तर सबै विद्यार्थीको भर्ना लिने चाहना भए पनि भौतिक पूर्वाधारका कारण भर्ना गर्न नसकिएको प्रधानाध्यापक पोखरेलले बताए ।
हाल विद्यालयमा छात्र र छात्राको सङ्ख्या लगभग बराबरी रहेको उनको भनाइ छ । कक्षा १ देखि १२ सम्मका अतिरिक्त प्राविधिक शिक्षामा १८ महिने र २४ महिने कम्प्युटर तालिम ३ वर्षे डिप्लोमा इन कम्प्युटर र डिप्लोमा इन सिभिलका कक्षाहरू सञ्चालित छन् ।