धरान : नेवा: देय् दबु धरानले भोली बिहीबार भानुचौकमा छैटौँ बृहत् लाखे नाच प्रदर्शन गर्ने भएको छ । 
प्रदर्शनमा धरानका नेवार समुदायका २५ वटा समूहको लाखे नाच सहभागी हुने बुधवार दबूँ ले पत्रकार सम्मेलनमा जनाएको हो ।
नेवार समुदायको धार्मिक तथा सांस्कृतिक मान्यता अनुसार लाखे नाच्ने समय नाग पञ्चमी देखि कृष्ण अष्टमीको भोलिपल्ट सम्म रहेको दबुका अध्यक्ष मनोहर शाक्यले बताए । 
उनले भने ‘धार्मिक, सांस्कृतिक मान्यता बाहेक पनि विभिन्ने उत्सव र समारोहमा लाखे सहित आदिवासी जनजातिहरूको सांस्कृतिक नृत्यहरू प्रदर्शन गर्ने चलनले विकृति ल्याएको छ ।’
नेवार समुदायको लाखे नाच पछिल्लो समय गैर नेवार समुदायले पनि नाच्ने र आर्थिक सङ्कलन गर्ने गरेको पाइएको बताउँदै अध्यक्ष शाक्यले भने ‘यस कारण दबूँ ले लाखे समूहले दर्ता गर्नुपर्ने र नौ बुँदे आचार संहिता भित्र बस्नु पर्ने नियम जारी गरेको थियो ।’
उनका अनुसार वृहत् लाखे नाचको आयोजना लाखेको संरक्षण, प्रवर्द्धन गर्नका लागि नेवा: देय दबुले गर्दै आएको हो । बृहत् लाखे नाच प्रदर्शनमा दाफा भजन सहित नृत्य पनि प्रस्तुत हुने बताइएको छ ।